Cwrs Gwerin Ieuenctid Preswyl 4 Diwrnod
Mae Gwerin Gwallgo yn gwrs preswyl pedwar diwrnod llawn egni i bobl ifanc rhwng 11 ac 18 oed. Dyma gyfle i wneud ffrindiau, datblygu sgiliau newydd, ac adeiladu repertoire o gerddoriaeth draddodiadol Gymreig, dawns, canu a stori-adrodd. Mae’r cwrs yn denu tua 40 o bobl ifanc ac yn cael ei gynnal yn Glan Llyn – Canolfan Breswyl yr Urdd yn y Bala. Mae’r ganolfan yn cynnig gweithgareddau awyr agored, fel canŵio ac adeiladu rafftiau, y gallwch eu dewis fel rhan o’ch amserlen. Mae’r cwrs yn cynnwys gwersi offerynnol, canu a dawnsio clog, yn ogystal â sesiynau band mawr a chanu ar y cyd yn ystod y dydd. Yn y nos, ceir sesiynau anffurfiol, cyngherddau, twmpathau a mwy.
Mae Gwerin Gwallgo yn ein helpu i feithrin y genhedlaeth nesaf o gerddorion a thiwtoriaid proffesiynol, yn ogystal â’r rhai sy’n mwynhau cerddoriaeth werin a dawns er mwyn y hwyl yn unig. Ffurfiwyd bandiau ifanc fel Beca a Tant yno, ac mae gan bobl ifanc hŷn gyfle i ddychwelyd fel gwirfoddolwyr. Mae rhai, fel Aneirin Jones o VRï, a Rhys Morris ac Osian Gruffydd o AVANC, wedi mynd ymlaen i fod yn diwtoriaid ar y cwrs! Mae llawer o ‘raddedigion’ eraill wedi ymuno â’n prosiect, Ensemble Gwerin Ieuenctid Cymru, a gychwynnodd fel cynllun peilot yn 2018. Cymerwch olwg ar restr chwarae YouTube Gwerin Gwallgo isod!
Dosbarthiadau
-
Mae angen i chwaraewyr ddod â’u hofferyn eu hunain, a bod yn gallu chwarae i safon sylfaenol o leiaf. Gofynnir i chwaraewyr offerynnau nodi eu lefel profiad bras wrth archebu, gan ddewis o’r opsiynau canlynol:
Dechreuwr: mae gennych wybodaeth sylfaenol am eich offeryn, a gallwch chwarae graddfeydd hawdd a rhai alawon syml.
Canolradd: rydych yn chwaraewr mwy hyderus, ac yn gyfarwydd â gwahanol fathau o alawon.
Uwch: chwaraewr hyderus sydd â phrofiad helaeth.
Nid oes angen gallu darllen cerddoriaeth, nac unrhyw wybodaeth am gerddoriaeth werin. Yn unol â thraddodiad cerddoriaeth werin, mae’r rhan fwyaf o’r gweithdai yn cael eu dysgu ‘trwy’r glust’.
-
Rydym yn cynnig tiwtora ar lefelau dechreuwr, canolradd ac uwch, gan ddarparu ar gyfer lefelau profiad gwahanol.
-
Mae'r rhain ar agor i bawb, o ddechreuwyr i gantorion profiadol. Nid oes angen profiad blaenorol o ganeuon gwerin.
Archebu a Bwrsarïau
Mae'r cwrs hwn yn gwbl gynhwysol - mae'r gost yn cynnwys yr holl brydau bwyd, llety a ffioedd dysgu.
Rydym am i bawb fwynhau'r cwrs hwn. Rydym yn cynnig llwybr mynediad personol a adeiladwyd gan Gelfyddydau Anabledd Cymru. Mae hwn wedi'i gynllunio i'ch helpu i ddweud wrthym am unrhyw ofynion corfforol a niwroamrywiol a allai fod gennych. Mae ein bwrsariaethau wedi'u cynllunio i gefnogi pobl a allai wynebu rhwystrau ariannol i gael mynediad i'n cyrsiau.
Am docynnau a rhagor o wybodaeth, ewch i'r dudalen hon unwaith y bydd yr archeb ar waith neu cysylltwch drwy e-bost.
